Das Bobohle-Lied

1.

Jo so a Gschwätz des isch zom Kotza,
do gang no hendre an da Klotza,
kasch da Bobohle grad no sea,
wie er em Leba emmer gwea.

Los her des duet mr abr loid,
den kennat sea bloß gscheide Leit,
drom wenn da koin Bobohle kennsch,
no bisch halt it dr hellschde Mensch.

Refrain:

Es glaubet viele Persona,
dr Bobohle sei bloß gloga,
der isch no lang it dot,
des saget dia Leit vo Rot.

2.

Jo gosch du hoimwerts vo Stoihausa,
no baß bloß auf, do wird drs grausa,
dr Lomp der fiehrt de uff da Loim,
do kommsch vor viere nemme hoim.

Der hot oim alles dau zum Bossa,
sogar dr Bäure d'Mill ausgsoffa,
se fluechet des sich nemme schea,
so frech isch doch no koiner gwea.

Refrain:

3.

Fiehrt oiner hoim en Waga Hai,
den wirft d'r Fetz en Graba nei,
der keit da ganza Haistock ra,
do hosch dei Freid, des ka dr sa.

Verhexa dued'r Säu ond Kia,
sogar d'r Gaul will nemme zia,
gatzga don't se zwar dia Henna,
bloß em Nest isch nia was denna!

Refrain:

4.

Weit dohenda do em Klotza,
onder ema reachta dicka Stotza,
hants'n end Kanta nei verbannt,
etz isch a Ruah em Oberland.

Etz nemmed uir Glas end Hand,
ond broschded oin uffs Narragwand,
mir kenned froh on luschdig sei,
bis'r fend en's Kloschter nei!

Refrain: